મઝધારે નૈયા January 9, 2008
Posted by devikadhruva in : કાવ્યો , add a comment
મુક્તક :
ભવસાગરમાં વહેતી નૈયા,
હું નથી કાબેલ તરવૈયા,
પ્રભુ, તુજ વિણ ન કોઇ ખેવૈયા,
પાર ઉતાર મઝધારે નૈયા.
લીલું પાન December 18, 2007
Posted by devikadhruva in : કાવ્યો , add a comment
પાન લીલું, બની રાતું,
ખરે પછી થઇ પીળું,
સાવ નરવું કુદરત તારું,
રૂપ નીતરતું ભીનુ;.
જાણે ક્યાંથી પીંછી બોળી,
નિસર્ગ રચે રંગોળી,
દ્રશ્ય પછીતે ભાસે કોઇ,
રમતું આંખ-મીંચોલી.
નિસર્ગનું શ્વેત રૂપ December 8, 2007
Posted by devikadhruva in : કાવ્યો , add a comment
ઝરમર ઝરમર આભથી વરસે,
શ્વેત મોગરાનાં ફૂલો જાણે;
કોમળ કોમળ તાજા સ્પર્શે,
વાદળ રૂના ઢગલા જાણે;
પડતાં પડતાં ડાળ પર થીજે,
ક્રિસ્ટલ હો કોઇ મંડપ જાણે;
સરકી સરકી શાંત પડે એ,
સફેદ મુલાયમ ચાદર જાણે;
બર્ફીલા ભીનાં રૂપો કલ્પે,
આભ-ધરાનું મિલન જાણે.
તડપ November 29, 2007
Posted by devikadhruva in : કાવ્યો , 3 commentsદરિયાને લાગી તરસ !
એને મીઠા બિંદુની તલાશ;
આભલાને લાગી ઓછપ,
એને ધરતીના ટુકડાની આશ,
તારલાને લાગી ઝાંખપ,
એ તો કોડિયાનો ઝંખે પ્રકાશ;
માનવીના મનને અજંપ,
જાણે પંખીની પાંખની કચાશ.
જાળાં November 22, 2007
Posted by devikadhruva in : કાવ્યો , 1 comment so far
સૌ પોતાની જાત સાથે જીવે છે,
જાણે કરોળિયાના જાળાં બનાવી જીવે છે.
લોહીના જાળા તો કદીક લાગણીના,
સ્વયંસર્જિત જાળાં વચ્ચે જીવે છે.
ગૂંચ વધારી, કદીક ઉકેલતા,
ચીસો પાડી, મરતાં મરતાં, જીવે છે.
અપેક્ષાના જાળાં, ને કદી ફરિયાદના,
સંપત્તિના યે જાળાં વચ્ચે જીવે છે.
ભૂતની સ્મૃતિના,ને ભાવિની ચિંતાના,
જાળાં મધ્યે આજ બગાડતાં જીવે છે.
અરે,પ્રેમની પ્યાસમાં વેર વધારતાં !!
આજમાં રહીને કોણ આજે જીવે છે ?
સૌ પોતાની જાત સાથે જીવે છે,
જાણે કરોળિયાના જાળાં બનાવી જીવે છે.
સ્મૃતિ November 16, 2007
Posted by devikadhruva in : કાવ્યો , 1 comment so farઅતીતના આગળે અડક્યાં જ્યાં આંગળાં,
પગરવ તમારા સંભળાયા;
સ્મૃતિનાં દ્વાર જરા ખોલ્યાં ન ખોલ્યાં,
પડછાયા તમારા દેખાયાં;
શૈશવમાં કદમ જ્યાં સંગ સંગ માંડ્યાં,
એ રસ્તા ફરીથી અફળાયાં;
સાથ સાથ ગીતો જે સૂર મહીં ગાયાં,
એ શબ્દો ફરીથી પડઘાયાં;
મિલનના આશ-દીપ મનમહીં પ્રગ્ટ્યાં,
વિદાયના વાયરે બૂઝાયાં.
****—————————–****——————————–****—————
જેના જન્મની તારીખ ,એના મૃત્યુની પણ તારીખ બની, એવા એક નિકટના મિત્રની
યાદમાં, તેની બીજી પૂણ્ય તારીખે,ઉપરોક્ત સ્મૃતિ…….11/14
નવા વર્ષનો સૂરજ November 10, 2007
Posted by devikadhruva in : કાવ્યો , add a commentબેસતા વર્ષની શુભ શરુઆત…..સાલ-મુબારક….
ઇશ્વરના રૂપ સમા સૂરજની વાત….
ફરી એક્વાર….આપની સમક્ષ રજૂઆત….
*—————–*—————-*——————*————-*
પૂરવનો જાદુગર આવે,
છાબ કિરણની વેરે;
હળવે હાથે ધીમુ સ્પર્શે,
પડદા પાંપણના ખોલે.
અંગ મરોડે કાલની વાતે,
આશ નવી કોઇ લાવે;
મંચ આકાશે નર્તન કરતે,
રંગ અનોખા વેરે.
કોમળ સવારે,તપ્ત મધ્યાન્હે,
શીળો બને સમી સાંજે;
સુદૂર સાગરે ડૂબી અન્તે,
પુનઃ પ્રભાતે પધારે.
જાદુગરનો ખેલ અનેરો,
ખુબ ખુબીથી ખેલે;
પૂરવ દિશાનો સુરજ ઊગે,
છાબ કિરણની વેરે.
શુભેચ્છા November 7, 2007
Posted by devikadhruva in : Uncategorized , add a comment 
કુદરતે કરવટ ક્ર્મે લીધી,કાલના પાન ખેરવી આજે,
કૂંપળ નૂતન વર્ષની ફૂટી,આશાનું બીજ ખીલવી આજે,
ઇશ્વર સંગત કરી ગોઠડી,પ્રાર્થના શિર નમાવી ભાવે,
તનમનની હો શાંતિ સાચી,શુભેચ્છા અંતરથી સૌને….
લગાવની લગામ November 1, 2007
Posted by devikadhruva in : કાવ્યો , add a commentએને મેં એક દિન સકારણ છોડી હતી,
હ્રદયને ઠેસ ત્યારે ઉંડી વાગી હતી.
લાગતી યંત્રવત આસપાસ છતાંયે,
હરપલમાં રોજ ત્યારે છવાઇ હતી.
વર્ષોની સફર, સફળતાથી સાધી એવી,
લગાવની લગામ ક્યાં રોકાઇ હતી ?
સરિતા યાદોની છલકાઇ ગઇ અમથી,
કે પ્રેમની એ વણકહી પ્રતીતિ હતી ?
કલમ પર આવીને વળગી અડિયલ,
સમજાઇ હા, ત્યારે, એ તો મારી બેંક હતી !!!!!!!
8 Comments | કાવ્યો | Permalink
પૂનમ રાત October 25, 2007
Posted by devikadhruva in : કાવ્યો , add a comment
મારે મનને મંદિરિયે,રૂમઝુમ રૂમઝુમ તું ફરે,
મારે પગને ઝાંઝરિયે,છુમછુમ છુમછુમ તું ફરે.
મા જ્ઞાતા છે સર્વકાલ,
આ દિલડું છે અણજાણ,
રહી મુજમાં તું ક્ષણભર
પ્રાર્થી લે તને ઘડીભર.
હરપલ ઝંખુ હું સહાય,નિકટ રહેજે તું સદાય…..મારે મનને મંદિરેયે….
મારે અંતર આકાશે,
ખુશીના પંખી ઉડે,
મારે આતમ આવાસે,
તાળી ને રાસ રમે.
મારે આંગણ નવ નવરાત, ખેલે સહુ પૂનમ રાત…મારે મનને મંદિરિયે
