પારેવાની પીડા June 21, 2008
Posted by devikadhruva in : કાવ્યો , add a comment 
પારેવાની પાંખમાં વેદના કણસાય છે,
આભમાં આજ કશુંક અશુભ વરતાય છે.
મુક્ત ગગનમાં વિહરતા પંખીને,
અચાનક કાં વ્યાકુળતા વીંટળાય છે ?
આઝાદીનાં ગીતડાં ગાતો માનવી,
વિહંગના ઉંચા ઉડ્ડયનથી કતરાય છે !
જાળમાં ફસાઇ,પિંજરમાં પકડાયેલ,ભેરુને જોતાં,
માળાના પક્ષીને હવે સઘળું સમજાય છે.
નીડમાં છુપાઇ,દર્દને લપેટી ગભરુ પંખી,
પાંખો ફેલાવીને હવે ઉડતાં ગભરાય છે.
‘ટ’નો ટહૂકો June 18, 2008
Posted by devikadhruva in : શબ્દારંભે અક્ષર એક , add a comment
ટિક…ટિક..ટિક..ના ટકોરે
ટોડલે ટહૂકો.
ટોડલાને ટહૂકે,
ટપ…ટપ…ટપ…
ટોળાંઓ ટપકે.
ટપકતા ટોળાઓ,
ટગર…ટગર…ટગર..
ટહૂકાને ટળવળે.
ટમ…ટમ…ટમ…
ટશરો ટમકે.
ટમકતી ટશરે,
ટાઢને ટાણે,
ટૂંકો ટચૂકડો,
ટોડલો ટહૂકે.
ટિક..ટિક…ટિક…ના ટકોરે
ટોડલે ટહૂકો..
‘ઝ’ની ઝલક June 13, 2008
Posted by devikadhruva in : શબ્દારંભે અક્ષર એક , add a commentઝરુખેથી ઝુકી ઝરણા ઝુમે,
ઝુમક ઝુમક ઝાંઝર ઝુમે;
ઝરમર ઝરમર,ઝીણી ઝીણી,
ઝંખના ઝાકળભીની ઝમકે.
ઝગમગ ઝગમગ ઝુમ્મર ઝુલે,
ઝુલ્ફ ઝળુંબી ઝાંપે ઝુલે,
ઝાંખી ઝલક ઝાંઝવાની ઝીલી,
ઝબકી,ઝટકી ઝીલ-શી ઝળકે.
‘જ’નો જાદૂ June 4, 2008
Posted by devikadhruva in : શબ્દારંભે અક્ષર એક , add a comment 
( જળકમળ છાંડી જાને બાળા….ના રાગમાં )
જલકમલવત્ જીવી જાને,
જરૂર જગન્નાથ જાગશે,
જાગશે જે જાણશે જ્યારે,
જીવનની જ્યોતિ જશે…………જી……..જલકમલવત્
જન્મ, જુવાની જે જરાના,
જીવે જગત જંજાળમાં,
જર,જમીન,જોરૂ જનોના,
જખમો જીરવી જાણજે…………જી………જલકમલવત્
જગમાં જામ્યા જંગી જાળા,
જાદૂના જામ જબાનમાં,
જલસામાં જકડી જશે,
જયાં જિગરને જાકારશે………..જી………જલકમલવત્
જોબન જોશીલાની જ્વાળા,
જતનથી જાળવી જજે,
જીસ્મથી જશે જીવ જ્યારે,
જાલીમ જમાનો જલાવશે………જી……..જલકમલવત્
તમન્ના May 27, 2008
Posted by devikadhruva in : કાવ્યો , add a comment
તમન્ના છે આભની પાતળી વાદળી બનું,
કે ઝાકળભીના પુષ્પની પાંદડી બનું;
ઉંચા કોઇ તરુવરની ડાળખી બનીને,
વિસામો ઝંખતા કો’શ્રમિત પથિકની છાંયડી બનુ……….
તમન્ના છે પૂનમની રાતની ચાંદની બનું,
કે કાજલકાળી અમાસી રાતની તારલી બનુ;
આંસુ સારતી,પ્રોષિત-ભર્તૃકાની વાટડી બનીને,
નાનકડા ગામની ઝુંપડીની આશા-દીવડી બનુ…………
તમન્ના છે મઝધારે ડૂબતા માનવીની નાવડી બનુ,
કે,કુદરતનો કોપ પામેલ અપંગની લાકડી બનુ,
મેઘલી રાતે નવજાત શિશુને શિર પર લઇ,
સરિતા પાર કરતા વસુદેવની છાબડી બનુ…………….
તમન્ના છે વિયોગિનીને ડોલાવતી વાંસળી બનું,
કે,મંદિરના પૂજારીની ભાવભીની આરતી બનું,
સઘળું થાઉં કે ઘડીભર કંઇ એક માત્ર થાઉં,
બસ, તારી કલાની એક સુરેખ આકૃતિ બનું….
‘છ’ છેલછોગાળો May 20, 2008
Posted by devikadhruva in : શબ્દારંભે અક્ષર એક , add a commentછેલછોગાળો છેટેથી છોને,
છેડતો છુપછુપ છાનો છાનો,
છેલછબીલો છલછલ છલકે,
છબીમાં છટાદાર છે છાયો……..
છલિયો છેડો છોડે ને છેડે,
છાયલ છોરી છન છન છણકે,
છલિયો છળકપટથી છાવરે,
છત્રાકારે છિપશા છિદ્રો,………
છપ્પન છડી છોડને છેડે,
છગોલે છટકે છોભીલ છોરો,
છુમ..છુમંતર છાવણી છેલ્લે,
છંદમાં છેડે છાલક છાંટો……….
છેલછોગાળો છેટેથી છોને,
છેડતો છુપછુપ છાનો છાનો……..
‘ચ’નો ચાંદ May 9, 2008
Posted by devikadhruva in : શબ્દારંભે અક્ષર એક , add a comment 
ચાંદનો ચિરાગ ચમક્યો,
ચિતારાનો ચહેરો ચમક્યો;
ચાંદનીમાં ચાલતા ચિત્રમાં,
ચિત્તડાનો ચોર ચમક્યો..
ચોરેલી ચિનગારી ચિત્તચોરે ચાંપી,
ચોરે,ચૌટે ચર્ચાઓ ચાલી;
ચોમેર ચાંદનીમાં ચાલતાં ચાલતાં,
ચકોર ચૌલા ચક્ચૂર ચાલી..
ચંદનપુરની ચોળી ને ચુંદડી,
ચણક ચણોઠીશી ચૂડી;
ચીવટથી ચીંથરે ચીટકેલી ચીઠ્ઠીમાં,
ચકમકતી ચાહતની ચાંદી.
ચાહના ચકરાવે ચાતક ચોમાસે,
ચડ્યાં ચક્ડોળે ચકો ને ચકી;
ચોમેર ચોતરે ચૂવા-ચંદન,
ચોપાસ ચિક્કાર ચંપો-ચમેલી.
*************************************************************
એક ચિત્રકાર ચાંદનીમાં ચાલવા નીકળે છે.એના ચિત્તમાં ચાહતના કેટકેટલાં ચિત્રો ઉપસે છે ? એકસાથે તેને ચિત્તચોર,ચૌલા નામની નારી,ચાતક,ચકલો ને ચક્લી,ચૂવાચંદનની સુગંધ,ચંપો ચમેલી વગેરે ઘણાં ઘણાં ચિત્રો મન:પટ પર આવે છે. તેનો આ ચિતાર છે.
‘ઘ’ની ઘડી May 2, 2008
Posted by devikadhruva in : શબ્દારંભે અક્ષર એક , add a commentઘડિયાળના ઘંટમાં ઘૂમાતા ઘાટ,
ઘડીની ઘંટીમાં ઘૂંટાતા ઘાવ,
ઘટના ઘૂમ્મટમાં ઘેલાં ઘનશ્યામ,
ઘડીકમાં ઘડીને ઘસતા ઘરબાર.
******************************************
ઘનઘોર ઘટા ઘેરી,
ઘેર ઘોર ઘટના ઘટી.
ઘેરા ઘેરા ઘેનમાં ઘેલી,
ઘરેણાના ઘણાં ઘાટ ઘડી,
ઘમ્મર ઘમ્મર ઘરમાં ઘૂમી.
ઘૂંઘટમાં ઘાટે ઘાટે ઘૂમી.
ઘૂમતી ઘાટીલીથી ઘાયલ ઘમંડી,
ઘોડેસ્વાર ઘૂંટે ઘવાઈ ઘવાઈ.
*******************************************
“ગ”ની ગઝલ April 22, 2008
Posted by devikadhruva in : શબ્દારંભે અક્ષર એક , add a commentApril 22, 2008
ગોરીના ગીતે ગગન ગૂંજ્યું,
ગરવી ગુજરાતનું ગામડું ગાજ્યું,
ગૂંથેલ ગજરે,ગર્વીલી ગાથા,
ગરબે ગવાતા,ગાંધર્વોને ગમ્યું.
ગૌરવર્ણાએ ગોવૃંદનું ગોતતા,
ગોપાલ ગોવરધનને ગમ્યું.
ગોતી ગોતીને ગોરસનું ગાતાં,
ગઝલમાં ગુલતાન ગવૈયાને ગમ્યું.
ગગનાંગનાની ગર્વિષ્ઠ ગ્રીવા,
ગજગામિની ગોપીઓને ગમ્યું.
ગુસ્સામાં ગાગરને ગોઠવીને ગાતાં,
ગુમાનધારી ગજેન્દ્રને ગમ્યું.
ગોરીની ગિરા ગલીએ ગવાતા,
ગુણવાન ગુરુજનોને ગમ્યું.
“ખ”નો ખિતાબ April 10, 2008
Posted by devikadhruva in : શબ્દારંભે અક્ષર એક , add a comment
ખરો ખિતાબ ખેડૂતને ખોળે,
ખેતીમાં ખુદનું ખોળિયું ખોવે;
ખૂણે ખાંચરે ખેતર ખેડે,
ખેડૂત ખાટલે ખુશીથી ખીલે.
ખેદેવો ખુશકિસ્મતી ખેરવે;
ખાંડ-ખજૂરના ખાદ્યો ખડકે.
ખગોળે ખેચર ખેલો ખેલે,
ખેડૂત ખાલી ખોલી ખોલે.
ખોળાના ખુંદનારનો ખાલીપો ખટકે,
ખીણશો ખાલી ખાલી ખખડે;
ખોતરી ખામોશી ખ્યાલોમાં ખૂંદે,
ખેંચે ખમીર ખેતીના ખીલે.
ખમ્મા ખમ્મા, ખોબે ખોબે,
ખરો ખિતાબ ખેડૂતને ખોળે.
