ખબર નથી May 25, 2007
Posted by devikadhruva in : કાવ્યો , 4 comments 
ક્વચિત લખુ છું પ્રસંગે પ્રસંગે,
પણ લખુ છું શું….. ખબર નથી.
કાગળના મંચ પર કલમ નાચે છે,
પણ તાલ શું, લય શું…..ખબર નથી.
લાગણીઓ સાકાર બને શબ્દરૂપે,
પણ પ્રાસ શું,કવિતા શું …..ખબર નથી.
સમય સરે છે,મોડ બદલે છે,
યુવાની ક્યારે પ્રૌઢ બને છે…..ખબર નથી.
યુગો વીતે છે યાંત્રિક્તા વધે છે,
પણ હ્રદય એનું એ જ કેમ…..ખબર નથી.
આંકડા અને અક્ષરોની વચ્ચે જિંદગી સરે છે,
કેવી રીતે અને કેવી…..ખબર નથી.
વનની મધ્યે ઊભી છું નિવ્રુત્ત-પ્રવ્રુત્તિમાં પરોવાઈ છું,
ક્યારે ક્યાં વિરમીશ…..ખબર નથી… …
ગઝલકાર આદિલભાઇ મનસુરીને…. May 18, 2007
Posted by devikadhruva in : કાવ્યો , 2 commentsગઝલ-સમ્રાટના શુભ જન્મદિને
ઉર્મિઓ પ્રગ્ટે છે શબ્દાકારે;
કસબી ગઝલના આદિલજીને
શુભેચ્છાઓ દે છે દિલની આજે.
સુગંધ શ્વાસમાં લઇ ફરે નગરને
શબ્દ મૌનની ધુમ મચાવે;
ધૂળ માથે લઇ ફરે વતનને
પૂર્વથી પશ્ચિમ સિધ્ધિ લહેરાવે.
અનોખા અગ્રણી આ ગઝલકારને,
શુભેચ્છાઓ ફરી ફરી વંદન સાથે.
———————————————————————
છ્ન્નુની સાલમાં આદિલભાઇના સાઠમાં જન્મદિને સુરેશ દલાલે લખેલા શબ્દો ટાંકીને વિરમીશ.
“આદિલની ગઝલના રેશમી પોત પર કલ્પનનુ બારીક નક્શીકામ છે.એમની ગઝલોમાં શબ્દ-રમત કે કરામત નથી.આદિલને વાંચો તો તમે સુખથી બેચેન થઇ શકો અને ચેનથી દુ:ખી થઇ શકો.આદિલ જેવો ગઝલકાર વરસે બે વરસે નહિ પણ પચીસ પચાસ વરસે મળે તો મળે.”
બાજીગરનો ખેલ May 17, 2007
Posted by devikadhruva in : કાવ્યો , add a comment
પાં…ચ તત્વોનાં રચ્યાં
મારા રામે કેવાં માનવ રે,
કાયા કામણગારી સજીને
માયા કેરાં મિલન રે….. પાં..ચ તત્વોનાં રચ્યાં
જનમ-જનમના જીવો ક્યાંથી
જગમાં આવી ભળતા;
વિસ્મયનો સંસાર રચીને
અલોપ પણ એ થાતા રે…પાં..ચ તત્વોનાં રચ્યાં
અલકમલકની વાતો વેરી
સુખ-દુઃખને એ ગાતા;
કઠપુતળીના ખેલ સમા સૌ
બાજીગરના ખેલ સમા સૌ
પડદો પડે વિરમતા રે….પાં..ચ તત્વોનાં રચ્યાં
સમય May 13, 2007
Posted by devikadhruva in : કાવ્યો , 5 comments
સમયના સામર્થ્યની વાત સહજ નથી
સમય ઘડિયાળના ફરતા કાંટા નથી
સમય વીતીને કદી પાછો વળતો નથી
કે ભાવિની વીતક કદી કહેતો નથી.
સમય તિથિ-વારમાં વહેંચાતો નથી
કે કોઇની મૂઠીમાં કદી બંધાતો નથી
સમય આંસુથી યે રોકાતો નથી
કે સ્મિતથી કદી છેતરાતો નથી.
નથી…,નથી…,નથી.નો આ સમય શું છે ?
સમય તો અનન્તની વિસ્મયલીલા છે.
સમય અનાદિથી સરતી અવિરત ધારા છે.
સમયને જાણવો અને જિરવવો જિગરનું કામ છે.
સમય તો ક્ષણ ક્ષણની સમજ છે.
સમય ઇશ્વરના સામર્થ્યનો અંશ છે…
—-inspired by Dhuni Mandaliya’s article SAMAY in Guj.Times dt.Jan a6 2004——–
મનના મોર May 11, 2007
Posted by devikadhruva in : કાવ્યો , 3 comments 
કોઈની સૂની ડાળ પર બોલે,
મોરલા મીઠા સાદે,
ધીરા પગલે સુણવા જઈએ,
મનના કોડ કંઈ જાગે;
કોઈના સૂના બાગમાં મહેંકે,
ફૂલની ફોરમ પમરે,
હળવે હળવે માણવા જઈએ,
હૈયે વસંત મહોરે.
કોઈના ઘેરા નેણમાં ઉગ્યાં,
ભીના ભીના શમણાં,
મેઘ-ધનુષી તુણવા જઈએ,
પ્રેમ પટોળા નમણાં;
મારા ખાલી ઘરમાં ગુંજે,
કાલની ભીડના સુરો,
ખાટાં-મીઠાં ખોલી લઈએ,
સ્મ્રુતિના સૌ પડળો.
મુક્ત બંધન May 8, 2007
Posted by devikadhruva in : કાવ્યો , 3 comments
ચકો લાવે ચોખાનો દાણો
ને ચકી લાવે દાળનો;
ઘાસ-ફૂસ ને પીંછાનો
સજે માળો સળીઓનો.
ઉપર આભ નીચે ધરતી
વચ્ચે ડાળ પર માળો;
ટાઢ-તાપ કે વરસાદ
નહિ વિવાદ કે ફરિયાદ.
કુદરત અર્પે જ્યાં જે જ્યારે
ઝિલે બન્ને પ્રેમની વેલે;
મુક્ત ઊડતા ગાયે ગાન
સાંજ ઢળે માળે બંધાન.
સાત પગલાં આકાશમાં
સાર્થક સળીના મહેલમાં !
મુક્તિના આ બંધનમાં ?!
કે બંધનની આ મુક્તિમાં?!!!!!
જિંદગી May 6, 2007
Posted by devikadhruva in : કાવ્યો , 2 comments
ક્ષણે-ક્ષણને એકત્ર કરો તો
ચિત્ર બને આ જિંદગી.
નવજાત બાલની પલ સ્મરો તો
માસુમ ભેટ આ જિંદગી.
યુવાન વયને વાગોળો તો
સ્વપ્નીલ લાગે જિંદગી.
વનની કેડીએ નજર કરો તો
જેવી જુવો તે જિંદગી,
આથમણે શમણે પ્રશ્ન શમે
જેવી જીવ્યા તે જિંદગી.
શબ્દોને પાલવડે May 5, 2007
Posted by devikadhruva in : કાવ્યો , 8 comments
ઘડીભર હું સંતાઈ ગઈ છુ,
અચાનક ક્યાંક ખોવાઈ ગઈ છું;
સમયના સન્નાટે અટવાઈ ગઈ છું,
મારા જ ઘરમાં જાણે ભૂલી પડી છું….
અજનબીની આંખમાં ઢંકાઈ ગઈ છું,
બેકદર નજરે નજરાઈ ગઈ છું;
ઝડપી ચક્ડોળે ક્ષણિક અટકી ગઈ છું,
શ્રધ્ધાની વાટ છતાં સંકોરી રહી છું….
સંજોગના આસને જડાઇ ગઈ છું,
સુષુપ્ત શક્તિને ઢંઢોળી રહી છું;
કોણ જાણે હું શું કરી રહી છું ?
હાલ તો શબ્દોને પાલવડે વીંટળાઈ રહી છું…
વિશ્વશાંતિ May 3, 2007
Posted by devikadhruva in : કાવ્યો , 6 comments
આતમે ઓઢેલ કાયાના વાઘામાં
ઇશ્વરનો અંશ જરા સમજી તું લે
મનને વરેલા વિચારોનાં પિંછામાં
ઉંચેરી આશા ઉમેરી તું લે
દિલને વીંટેલા આ માયાના વીંટામાં
સાચુકડી પ્રીત જરા વણી તું લે
સર્વત્ર સળગેલા દુન્યવી તણખામાં
સમજણની રોશની ફેલાવી તુ લે
જગતમાં જામેલા જુઠા સૌ વળગણમાં
સર્જક્નું સત્ય હવે જાણી તું લે
અંતરમાં જાગેલાં વિશ્વનાં સપનામાં
શાંતિનો દીપ પ્રગટાવી તું લે
કાળજડે કોરેલા થનગનતા કોડમાં
પ્રભુ સંદેશ હવે પામી તું લે
ફાગણના કામણ
Posted by devikadhruva in : કાવ્યો , 2 comments
મનને આંગણ આવે ફાગણ,
રંગોના લઇ કામણ;
વસંત વીંઝણા ઢોળે નમણા,
મેઘધનુષી શમણાં.
ફુલની ફોરમ મહેંકે આંગણ,
ઢાળે ઘેરા સૌ નેણ;
વાંસળી વેરણ બનીને કારણ,
જગવે આશ-કિરણ.
હોળી ખેલે માનવ-મહેરામણ,
ઉમંગ લાવે ફાગણ;
ધક ધક ધડકે હ્ર્દય અજાણે,
પ્રેમના ઢાઈ વેણે……….
