ચ્હાના ઘૂંટે ઘૂંટે મીઠી, કરીએ મનની વાતો. September 11, 2012
Posted by devikadhruva in : કાવ્યો , trackback
રોજ સવારે,ડેક પર સાથે,વાંચીએ ગમતી વાતો,
ચ્હાના ઘૂંટે ઘૂંટે મીઠી, કરીએ મનની વાતો.
સાંજ જીવનની શરુ થઇ,આ કેવી ક્ષણ ક્ષણ સરકી,
ભીંત પરના તારીખિયાના પાનપાન ઉડાડી,
જોતજોતામાં ઢળી જશે આ સૂરજ પણ મદમાતો,
ચ્હાના ઘૂંટે મીઠી કરીએ ચાહથી મનની વાતો.
કાલ હતું જે આજ નથી ને આજ છે, ન મળશે કાલે,
લખે વિધાતા ઝાંખી રેખા, કરવી સુંદર મારે-તારે,
તાર જુદા પણ એક જ સૂરમાં ગાશું દિવસ રાતો,
ચ્હાના ઘૂંટે મીઠી કરીએ અલકમલકની વાતો.
સામે બેઠા પંખી કેવા ડાળ ઉપર મલકતા,
રંગબેરંગી પાંખો લઇને ક્યાં ક્યાં જઇ અટકતા,
દેશ-વિદેશે ઉડી-ફરીને શોધે નિજનો માળો,
એ જ છેલ્લે સાચો, બસ ‘હું ને તું’ નો નાતો….
ચ્હાના ઘૂંટે મીઠી કરીએ, ચાહથી મનની વાતો.
Comments»
no comments yet - be the first?