શબ્દોને પાલવડે May 5, 2007
Posted by devikadhruva in : કાવ્યો , 8 commentsઘડીભર હું સંતાઈ ગઈ છુ,
અચાનક ક્યાંક ખોવાઈ ગઈ છું;
સમયના સન્નાટે અટવાઈ ગઈ છું,
મારા જ ઘરમાં જાણે ભૂલી પડી છું….
અજનબીની આંખમાં ઢંકાઈ ગઈ છું,
બેકદર નજરે નજરાઈ ગઈ છું;
ઝડપી ચક્ડોળે ક્ષણિક અટકી ગઈ છું,
શ્રધ્ધાની વાટ છતાં સંકોરી રહી છું….
સંજોગના આસને જડાઇ ગઈ છું,
સુષુપ્ત શક્તિને ઢંઢોળી રહી છું;
કોણ જાણે હું શું કરી રહી છું ?
હાલ તો શબ્દોને પાલવડે વીંટળાઈ રહી છું…