ત્વમેવ સર્વમ August 22, 2007
Posted by devikadhruva in : કાવ્યો , 15 commentsએક ગદ્યાપદ્ય :
તું અપરોક્ષ પણે નિશદિન સર્વત્ર સ્પર્શે છે,
તું જ અદ્રશ્ય રહીને પણ સર્વત્ર દ્રષ્ટિમાન છે,
સૂરજ- ચાંદ -સિતારા નીકળે છે ક્યાંથી ?
તારા જ રૂપના એ પર્યાય છે;
ક્ષણેક્ષણને એક્ઠી કરી યુગ રચે છે કોણ ?
તારા જ આકારનો એ આવિષ્કાર છે;
ઋતુઓ અને રંગો વિધવિધ બદલે છે કોણ ?
તારી જ પીંછીની એ કરામત છે;
વસંત પાનખરની રમત રમે છે કોણ ?
તારી જ આકૃતિની એ કલા છે;
જીવન-મૃત્યુની દોર,અરે એની વચ્ચેના
જીવન પટને વહાવે છે કોણ ?
તારી જ જાદુગરીનો આ ખેલ છે,
કઠપૂતળીઓ બનાવી સૌને નચાવે છે કોણ ?
તારા જ દિગ્દર્શનની આ સજાવટ છે ;
ભવ્ય રંગમંચના રચનારા એક સવાલ તને….
નેપથ્યમાંથી બહાર આવશે કદી ?
” અહમ્ અસ્મિ ” કહી દર્શન દેશે કદી ?
