દ્રષ્ટિ અને સૃષ્ટિ August 8, 2007
Posted by devikadhruva in : કાવ્યો , 11 comments
દ્રષ્ટિ ને સૃષ્ટિ બે સખી અનોખી,
સૃષ્ટિ રંગીલી ને દ્રષ્ટિ નિરાળી,
વીણો તો મોતી દે સૃષ્ટિ સુહાની,
પામો સૌ શૂન્ય જો દ્રષ્ટિ બીડેલી.
સૃષ્ટિ છે સૌની જાણે કે આરસી,
દ્રષ્ટિ છે સૌની મનની અગાશી,
માણી શકો જો સૃષ્ટિ આ રૂપાળી,
જાણી શકો જો દ્રષ્ટિ ના મીંચેલી.
સૃષ્ટિની કાયામાં પરવત ને ધરતી,
દ્રષ્ટિની માયામાં વિધવિધ મૂરતી.
પ્રભુની રચના અદભૂત આ સૃષ્ટિ,
ને તેની જ કૃતિ માનવની દ્રષ્ટિ,
બંનેની તોયે સ્થિતિ કેમ નીરાળી ?
કહો કોણ ચડિયાતી એણે આલેખી ?
જેવી હો દ્રષ્ટિ, દીસે તેવી સૃષ્ટિ,
વિશાળ સૃષ્ટિ સમી કાં ના દ્રષ્ટિ ?!!!
